الى ابي وامي وكل الكبار من بلادي المبدعين الذين رحلو عن هالارض

وهيك كلون راحو تعودو الكبار يروحو بصمت رهيب ويتركو وجع كبير وراهون
راحو وكان الهم وشو باقي غير الهم والقهر والحزن عا عطائون اللي ما اللو
حدود واللي باقي بذاكرة اللي كانو يحبوون .. عمبيخفو العمالقة وما بقا بعد
في كتير وبعدنا متل ما نحنا ما تغير شي ابدا الا انو عمنشتقتلون يوم بعد
يوم
الله يرحم ترابون زرعولنا دروبنا بالورد ووصللو كتار عا طبق من دهب من بعد ما مشيو عالشوك بس بكل حب ..
منحبوون وما رح ننساهون وبكل حب بقللون رح نكمل الطريق ورح ننطر متل ما
نطرتو تا ناخود حقوقنا .. صرتو كتار صلولنا بركي عالكترة بتقدرو تعملولنا
شي بوقت اللي سخفا اهل الارض ما قدرو يعملولكون شي .. وانتو بالقلب باقيين
يمكن بيجي مليون وزير ومية رئيس جمهورية واكتر بس بعد وقت بينزلو عن
كراسيون بس انتو باقين ما حدا بيقدر يزعزع كرستكون الباقية بقلوب المحبين

يا ريت كان في فايس بووك عا ايامكون تتعرفو قديش في ناس بتحبكون
بس اكيد عارفين وشايفين قلبكون كان دايما بيدلكون عالناس اللي بتحبكون

كل اللي راحو تعبو وشقيو وياما اشتغلو من دون مقابل حتى الفن يستمر بازهى عطائو
عا ايامكون وما فيي عدكون لانو صرتو كتار كان الفن فيه بركة ومحبة وامل ببكرا وكان هالامل يكبر مع الوقت وما كان يقل او يكل

علمتونا ودرستونا وفهمتونا ووعيتونا والاكترية منكون كانو اميين

اف شو كبار انتو وشو في عز بتقاسيم وجوهكون
اف شو كانت كرامتكون كبيرة تتوجعو وما تقولوا اخ
تبكو وما تخللو حدا يشوفكون
تحزنو وما تخللو حدا يحس فيكون

يمكن لاني بنت كبار غابو عن هالدني بحس فيكون اكتر
لاني عشت ايام فرحون وحزنون والالامون واوجاعون
وفرحون بالعطاء من غير حدود

حتى وانتو وعمبتنازعو عا فراش الموت ان حدا سالكون في دور زغير منحب تشاركونا فيه
كنتو تنطو متل ولد شاف امو من بعد غياب وتنسو انو ما بقا قادرين توقفو او تمشو

خلق الفن بدمكون وعطيتوه من روحكون والفن كان روحكون وحياتكون ونسمة الحياة اللي بتتنفسوا
التمثيل كان بالنسبة الكون هوي الحياة والفرح واوكسيحين عمركون
بحياتو ما كان تجارة وجني المال والفيلات والسيارات ورصيد ببنك ما ممكن يفلس بيوم
وما كنتو تعرفو شو يعني بورصة

انتو الفيزا المفتوحة اللي وصلتو الدراما اللبنانية لكل العالم العربي
انتو الباسبور اللبناني اللي حملتوه بكل فخر وكان اخر همكون جنسية غير جنسيتكون
عشتو الحرب متل اي مواطن للبناني وعاصرتو كل اللي عصرو هالبلد بدموع عينيكون

بحبكون واحد يقول للتاني وبقلكون يا بيي ويا امي ويا كل اللي راحو عن هالارض
كل ما يغيب واحد منكون منرجع متل الاول بتكبر الغصة كتير ومنختنق اكتر

بعد غيابكون صارت السما مغيمة والصيف ما عدنا حسينا فيه السما ما عادت
كاشحة وغيوم السما ما عادت ترحل متل ما رحلتو .. بس الشمس بعدها شارقة
والامل بعدو بقلوبنا وما رح نتغير ورح نبقى معكون عالعهد .. عهد العطاء من
دون قيد او شرط ومن كل القلب يمكن قلال اللي بقيو هيك بس رح نكمل لوحدنا
...
انتو ما متوووووو انتو بالقلب باقيين .. الكبار ارواحون بتبقى ترفرف بالسما

تعجب الكون وسالكون انتو مين
قلتولون نحنا ممثلين
زرعنا ورود عا دروب الايام
كبرنا سوا وعلينا جبيننا وشفنا حالنا بلبنان
وعطينا الوطن والارز والفن
تيضل الحلا بكل الازمان
وتركنا هالارض وكلنا ايمان بس بس بس بلبنان

بلوح بشالي وببعت سلام من بلد الحب
بنثر ورود عا دربكون الطويل وانتو بالقلب

تلميذتكون
ليليان عبده وعليا نمري








Add a comment

هاي ليليان
انا اكيز انو عليا و شرنو ما ميتو هنني بقلوبنا.
بحب قول انو انا محظوظ لان عرفتون عن قريب و لمست طيبتهون و انسانيتهن .
يمكن عم تسألي من وين بعرفهن . انا بعرفهون و بعرفك ليليان. بتتذكري بالاجتياح الاسرائيلي بال:80 . نحنا جينا قعدنا عند تانت ملفينا. و كينو تانت عليا و عمو شرينو يجو كل يوم يسالو عنا و يخفيفو عنا. و بعدني بتذكر كان عمو شرنو عندو سيارة كشف.
بحبون من قلبي .و يلي بحب التني بعيش بقلبو.
منشين هيك هني ما ميتو و لا لح يموتو

(K)lilooo kteer 7abet 3njd